屁屁花拎返屋企一夜化水...究竟點種先種得靚仔又大粒？呢度有最簡單易明既屁屁花種植心得！
其實屁屁花係咩黎？
屁屁花即是生石花（Lithops），因為太似patpat既關係，俗稱屁屁花。屁屁花原產地黎自南非，屬番杏科既多肉植物，也被稱為石頭花。
應該幾耐淋一次水？
屁屁花拎到返屋企，主要根據環境溫濕度決定淋水節奏，泥土一定要全乾透先好淋水，每次淋水要淋透至花盆底流水。
一般喺黃昏淋水會較好，因晚上涼快，避免日頭太熱而煮熱泥土入面既水，悶壞根部。
屁屁花喺春秋2季會生長得特別快，可加快淋水節奏，呢個時候屁屁花會生長得好快，漲卜卜生得好大粒！
脫皮後既屁屁花，有機會變成雙頭或三片。
夏天咁熱，會唔會焗死屁屁花？
炎炎夏日，唔好好照顧屁屁花，的確會焗死佢地！連續幾日太熱太焗既日子，可避免淋水；連續下雨潮濕既日子，亦需避免淋水。因為淋水後，環境又不夠乾爽通風，屁屁花就會容易焗死，一晚化水！無得救了；(
當然如果實在唔忍心佢地無飯開，可以喺連續晴天既黃昏於屁屁花表面噴水，咁樣可以比佢地敷個mask，噴水量係第2朝就要乾晒既程度，記得避免喺屁屁花表面有積水。
另外，如果唔肯定夏天幾時淋得水，可一直唔淋水，直至屁屁花出現皺紋，呢個係一個缺水既信號，呢個時候淋水就安全了！夏天亦要避免太陽直射，容易曬傷或化水。
屁屁花會開花嗎？
會！每到花期，屁屁花中間就會生個花苞出黎，無耐就會開出一大朵顏色鮮艷既花！一般屁屁花養到3年就可以開花了，通常大多數品種會喺10月/6月左右開花。當然開唔開花同幾時係花期，同好多因素有關係，可能係花芽分化時間養分供給唔夠或者環境不適宜，都會影響開花。當然如果過於徒長既屁屁花，花梗伸唔到出來，亦都會因為塞左喺入面開唔到花。
總結係，屁屁花需要一個通爽既種植環境，放置喺冷氣地方當然無問題，不在家時，打開窗通風，保持空氣流通。另外最好放置於窗邊，有充足日照，夏天避免太陽直射，咁屁屁花就會種得靚仔又大粒！當然淋水節奏都好重要，掌握到適當淋水節奏，屁屁花係可以一直健康種落去的！
Comments